Өмч хувьчлалын үр дүн, ядуурал, орлогын тэгш бус байдалтай холбогдох асуудлыг Монгол Улс болон гадаадын туршлагад тулгуурлан судалсан. Хувьчлалын үндсэн аргууд, тэдгээрийн давуу, сул тал болон төрийн монополь компанийн хувьчлалын онол, практикийг танилцуулсан. Аргентин, Мексикийн компанийн хувьчлалын жишээ, концессын арга болон Монголд төрийн монополь компанийг хувьцаат компани болгон өөрчлөх боломж, эрх зүйн орчныг авч үзсэн.

Монгол Улсын төсвийн харилцааны эрх зүйн зохицуулалт, төсөв боловсруулах, хэлэлцэх, батлах үйл явц болон Улсын Их Хуралд ажлаа тайлагнадаг, Засгийн газраас хараат бус байгууллагуудын санхүүгийн бие даасан байдлыг шинжилсэн. АНУ, Канад, Шинэ Зеланд, ОХУ, Украин улсын төсвийн тогтолцоо, парламентын хяналт, санхүүгийн хараат бус байдлыг хангах зохицуулалтыг харьцуулж, төсвийн эрх зүйн орчныг боловсронгуй болгох санал, зөвлөмж боловсруулсан.

Герман, Азербайжан, Польш, БНХАУ-ын жишээгээр нэр төр гутаах, гүтгэх, доромжлох, хуурамч мэдээлэл тараах үйлдлийн зохицуулалт, хариуцлагыг судалсан. Цахим болон хэвлэл мэдээллийн хэрэгслээр үйлдсэн тохиолдол, улс төрч, төрийн албан тушаалтан, нас барсан хүний нэр төртэй холбоотой зохицуулалтыг хамруулсан. Үйлдлийн шинж, нөхцөлөөс хамаарах торгох, эрх чөлөөг хязгаарлах, хорих зэрэг хариуцлагын хэлбэрийг танилцуулсан.

Төрийн байгуулал, төрийн байгууламж, засаглалын хэлбэр гэсэн ойлголтын ялгааг онолын эх сурвалжид тулгуурлан тайлбарласан. Монгол Улсын төрийн байгууллын түүхэн өөрчлөлт, Үндсэн хуулиудын холбогдох зохицуулалтыг тоймлосон. Их Британийн төрийн тэргүүн, парламент, Засгийн газар, кабинетын зохион байгуулалт, харилцааг авч үзэж, хоёр улсын төрийн байгууллын онцлогийг харьцуулсан.

Гадаадын улс орнуудын Үндсэн хуульд хотын эрх зүйн байдал, зэрэглэл, засаг захиргаа, нутаг дэвсгэрийн нэгжийг хэрхэн зохицуулсныг судалсан. Холбооны, улсын, аймгийн, дүүргийн, орон нутгийн зэрэглэлтэй болон тусгай статустай хотын зохицуулалтыг ангилан танилцуулсан. Монгол Улсын хотын зэрэглэлийн зохицуулалт, гадаадын зарим онцлох жишээг хамруулсан.

Гадаадын 23 улсын парламентын судалгааны нэгжийн харьяалал, эрх зүйн статус, үүсэл хөгжил, бүтэц зохион байгуулалт, чиг үүрэг, судалгааны бүтээгдэхүүнийг харьцуулан авч үзсэн. Парламентын гишүүд, байнгын хороодыг судалгаа, мэдээлэл, шинжилгээний материалаар хангах тогтолцоо, судалгааны нэгжүүдийн үйл ажиллагааны онцлог, зохион байгуулалтын ялгааг нэгтгэн танилцуулсан.

Нэр дэвшигчийг нэрийн жагсаалтаас хасахтай холбоотой эрх зүйн үр дагаврыг Монгол Улсын тухайн үеийн Сонгуулийн тухай хуулийн зохицуулалттай харьцуулан судалсан. Сонгуульд нэр дэвших, төрийн алба хаших эрхийн хязгаарлалт, дахин сонгуулийн зардал болон сонгуулийн зөрчилд хүлээлгэх хариуцлагыг авч үзсэн. Гадаадын 22 орны Ерөнхийлөгч, парламент, орон нутгийн сонгуулийн холбогдох зохицуулалтыг нэгтгэсэн.

Улаанбаатарын агаарын бохирдлыг бууруулахтай холбоотой хууль, шийдвэр, стандарт болон хэрэгжүүлсэн арга хэмжээний мэдээллийг нэгтгэсэн. Сайжруулсан зуух, түлш, халаалт, сэргээгдэх эрчим хүч, автомашины ялгарал, агаарын чанарын хяналтын асуудлыг хамруулсан. Хариуцсан байгууллагууд, төсөл, арга хэмжээний санхүүжилт, олон улсын байгууллагын оролцоо болон Бээжин, Лондоны туршлагыг танилцуулсан.

Монгол Улсын Их Хурлын судалгаа, шинжилгээний нэгжийн 1991–2009 оны түүхэн хөгжил, бүтэц, зохион байгуулалт, чиг үүрэг, эрх зүйн үндэслэлийг үе шаттайгаар авч үзсэн. Төр, нийгэм судлалын академиас эхлэн Судалгааны төв, Бодлогын шинжилгээний төв, Судалгаа, шинжилгээ, олон нийттэй харилцах төв болон хөгжсөн үйл явцыг нэгтгэн, судалгааны ажлын зохион байгуулалт, хүний нөөц, үйл ажиллагааны үр дүн, олон улсын хамтын ажиллагааг танилцуулсан

БНХАУ, ОХУ, Япон, Польш, БНСУ-ын шинжлэх ухааны салбарын удирдлага, академийн эрх зүйн байдал, бүтэц, чиг үүргийг судалсан. Академи, яам, зөвлөл болон бусад байгууллагын харилцаа, санхүүжилтийн тогтолцоог танилцуулсан. Монгол Улсын холбогдох хууль, байгууллагын бүтэц, шинжлэх ухааны санхүүжилтийн мэдээллийг гадаадын үзүүлэлттэй хамтатган авч үзсэн.

Тээгч эхээр хүүхэд тээлгэж төрүүлэхтэй холбоотой нэр томьёо, арилжааны болон хүмүүнлэгийн хэлбэрийн ялгааг танилцуулсан. Энэтхэг, ОХУ, Нидерланд, Их Британи, Австрали, АНУ, Турк, БНСУ-ын зөвшөөрөл, хориг, хязгаарлалтын зохицуулалтыг судалсан. Тээгч эх, захиалагч эцэг, эхэд тавих шаардлага, гэрээ, нөхөн олговор, эцэг, эхийн эрх болон маргаан шийдвэрлэх асуудлыг хамруулсан.

Олон улсын ахмадын өдрийг бий болгосон шийдвэр, Монгол Улсад тэмдэглэж ирсэн байдал болон 2016 оны урианы мэдээллийг танилцуулсан. Ахмад настны эрхийг хамгаалах олон улсын гол баримт бичиг, тэдгээрт тусгасан эрхийн бүлгүүдийг тоймлосон. Монгол Улсын ахмад настны нийгмийн хамгааллын зохицуулалт болон Засгийн газрын 2016–2020 оны үйл ажиллагааны хөтөлбөрийн холбогдох зорилтыг нэгтгэсэн.

Монгол Улсын төрийн байгууллагуудын албан хаагчдын тоо бүртгэл, орон тооны өсөлт, бууралт, цалингийн сангийн өөрчлөлтийг 2005–2008 оны мэдээлэлд тулгуурлан авч үзсэн. Төрийн байгууллагуудын хүний нөөцийн бүртгэлийн аргачлал, мэдээллийн зөрүү, давхар ажил эрхлэлт болон байгууллагын бүтцийн өөрчлөлтөөс үүдэлтэй тоо бүртгэлийн хүндрэлүүдийг тодорхойлж, яам, агентлагуудын орон тоо, цалингийн сангийн үзүүлэлтүүдийг харьцуулан нэгтгэсэн.

Ген, генийн сан, удмын сан, цус ойртолтын ойлголт, төрөл болон урьдчилан сэргийлэх асуудлыг тайлбарласан. Өмнө хийгдсэн судалгаанд тулгуурлан Монголын хүн амын цус ойртолтын түвшин, өвчлөлтэй холбогдох мэдээллийг танилцуулсан. Монгол Улсын удмын санг хамгаалах эрх зүйн орчин болон гадаадын орнуудын цус ойртсон харилцаа, гэрлэлтийг хориглох, хариуцлага хүлээлгэх зохицуулалтыг харьцуулсан.

Аялал жуулчлалын тусгай бүсийн ойлголт, үйл ажиллагааны хүрээ, аюулгүй байдал, татвар, газар болон өмчийн харилцааны зохицуулалтыг судалсан. Монгол Улсын аялал жуулчлалын салбарын бодлого, нөхцөл байдал, тулгамдсан асуудлыг танилцуулсан. БНСУ, БНХАУ, Япон, Индонез, Тайланд, АНУ-ын аялал жуулчлалын салбарын хууль, удирдлага, тусгай бүсийн туршлагыг харьцуулсан.

Монгол Улсын сууц өмчлөгчдийн холбооны үйл ажиллагаа, холбогдох хуулийн хэрэгжилтэд тулгарсан хүндрэл, зөрчлийн мэдээллийг нэгтгэсэн. Дундын өмчлөлийн эд хөрөнгө, орчны газар, засвар үйлчилгээ, төлбөр, удирдлага, хяналтын асуудлыг авч үзсэн. Филиппин, Турк, ОХУ, Герман, Канадын сууц өмчлөгчдийн холбооны эрх зүйн байдал, санхүүжилт, дундын өмчийн зохицуулалтыг харьцуулсан.