Гадаадын зарим улс, нутаг дэвсгэрийн барьцаалан зээлдүүлэх үйлчилгээний зээлийн хүү, хураамжийн хязгаарыг тогтоох зохицуулалтыг харьцуулсан. АНУ-ын мужууд болон Европ, Азийн зарим орны холбогдох хууль, журам, хүү тогтоох аргачлалыг хүснэгтээр нэгтгэсэн. Зээлийн хүүг сар, жилээр хязгаарлах, үйлчилгээний төлбөр тооцох болон төв банкны хүүтэй уялдуулан тогтоох зэрэг зохицуулалтыг танилцуулсан.

Монгол Улсын хөрөнгө оруулалтын бодлого, эрх зүйн орчныг бүрдүүлж буй хууль тогтоомж, бодлогын баримт бичгийг нэгтгэн авч үзсэн. Хөрөнгө оруулалтын хэлбэр, хөрөнгө оруулалтын гэрээ, гадаадын төрийн өмчит хуулийн этгээдийн хөрөнгө оруулалтад тавих шаардлагыг тайлбарласан. Мөн тогтворжуулах гэрчилгээ, татварын болон татварын бус дэмжлэгийн зохицуулалтыг танилцуулж, холбогдох хууль, Улсын Их Хурал, Засгийн газрын тогтоол, журмын лавлагааг хавсаргасан.

Их Британи, Франц, ХБНГУ, ОХУ, Беларусь, БНХАУ, Япон, БНСУ болон бусад улсын мэргэжлийн боловсрол, сургалтын тогтолцоо, удирдлага, эрх зүйн зохицуулалтыг харьцуулан судалсан. Мөн Монгол Улсын мэргэжлийн боловсрол, сургалтын эрх зүйн орчин, бодлогын хэрэгжилт, тулгамдсан асуудлыг шинжилж, холбогдох хуулийн шинэчилсэн найруулгын төслийг боловсронгуй болгох санал, зөвлөмж боловсруулсан бодлогын судалгаа юм.

Энэхүү судалгаагаар Монгол Улсын Нийгмийн даатгалын тухай болон Иргэний эрүүл мэндийн даатгалын тухай хуулиудын хэрэгжилтийн байдал, эрх зүйн орчин, даатгалын тогтолцоо, сангийн хөрөнгийн бүрдүүлэлт, зарцуулалтыг үнэлсэн. Мөн ОХУ, Беларусь, Казахстаны туршлагыг харьцуулж, даатгалын хамрах хүрээ, үйлчилгээний чанар, хүртээмж, санхүүжилтийн тулгамдсан асуудлыг тодорхойлон, хууль тогтоомжийг боловсронгуй болгох санал, зөвлөмж боловсруулсан бодлогын судалгаа юм.

Энэхүү судалгаагаар Австрали, Их Британи, ХБНГУ, АНУ, Канад, БНСУ, ОХУ болон бусад улсын парламентын гишүүдийн ёс зүйн эрх зүйн зохицуулалтыг харьцуулан судалсан. Гишүүдийн ёс зүйн дүрэм, хяналтын байгууллага, сахилгын хариуцлага, ашиг сонирхлын зөрчил, давхар ажил эрхлэлт, бэлэг дурсгалын зохицуулалтыг шинжилж, Монгол Улсын Их Хурлын гишүүний ёс зүйн зохицуулалтыг боловсронгуй болгох санал, зөвлөмж боловсруулсан харьцуулсан эрх зүйн судалгаа юм.

Монгол Улстай засаглалын хэлбэрийн хувьд ижил төстэй гэж сонгосон орнуудын ерөнхийлөгч, ерөнхий сайдыг нэр дэвшүүлэх, сонгох, томилох, чөлөөлөх зохицуулалтыг судалсан. Монгол Улсын Ерөнхийлөгчийн бүрэн эрхийг гадаадын 11 орны ерөнхийлөгчийн бүрэн эрхтэй харьцуулж, дангаар болон бусад субъекттэй хамтран хэрэгжүүлэх эрхийг ялган хүснэгтээр үзүүлсэн. Холбогдох бүрэн эрхийн хуулийн үндэслэл, парламентын чуулганы хугацаа болон төрийн тэргүүн, парламентыг сонгох хэлбэрийн нэмэлт мэдээллийг мөн оруулсан

Дэлхийн 25 орны төрийн тэргүүнийг огцруулах үндэслэлийг Үндсэн хуульд хэрхэн зохицуулсныг харьцуулсан. Үндсэн хууль зөрчих, эх орноосоо урвах, гэмт хэрэг үйлдэх зэрэг үндэслэл, огцруулах асуудлыг санаачлах болон шийдвэрлэх байгууллагын оролцоог улс тус бүрээр танилцуулсан. Мөн ерөнхийлөгч, ерөнхий сайд хугацаанаасаа өмнө албан тушаалаасаа чөлөөлөгдсөн тохиолдлын мэдээллийг зэрэгцүүлэн оруулсан

Монгол Улсын төрийн захиргааны байгууллагын удирдлагыг сонгох, томилох зохицуулалтыг 1960-1990 болон 1990-2015 оны үе шаттайгаар авч үзсэн. БНМАУ-ын Сайд нарын Зөвлөл, төрийн захиргааны төв болон орон нутгийн байгууллагын удирдлагыг сонгох, томилох журмыг тайлбарласан. Мөн төрийн албаны шинэ тогтолцооны эрх зүйн үндэс, удирдах албан тушаалын сонгон шалгаруулалт, нэр дэвшүүлэх журам, төрийн албаны төв байгууллагын оролцоог танилцуулсан.

Израилийн үндсэн хуулиудын тогтолцоог товч танилцуулж, Засгийн газар байгуулахтай холбоотой заалтуудыг албан бусаар орчуулсан. Засгийн газрын бүрэлдэхүүн, Кнессетийн итгэл, Ерөнхийлөгчөөс Засгийн газар байгуулах даалгавар өгөх, уг даалгаврыг хэрэгжүүлэх хугацаа болон өөр гишүүнд шилжүүлэх журмыг тусгасан. Мөн Засгийн газар байгуулагдаагүй тохиолдолд ээлжит бус сонгууль явуулах, бүрэлдэхүүнээ танилцуулж итгэл авах зохицуулалтыг оруулсан

Монгол Улсын төрийн бэлгэдлийн агуулга, түүхэн уламжлал, эрх зүйн зохицуулалт, төрийн далбааны өдөр бий болгох тухай хуулийн төслийн үндэслэл, ач холбогдлыг судалсан. Мөн ОХУ, Казахстан, Итали, Сингапур, Украин зэрэг улсын тэмдэглэлт баяр, төрийн далбааг дээдлэн хэрэглэх туршлагыг харьцуулж, Монгол Улсын тэмдэглэлт өдрүүдийн зохицуулалтыг боловсронгуй болгох санал, зөвлөмж боловсруулсан бодлогын судалгаа юм.

2015 оны гуравдугаар сараас зургаадугаар сарын хооронд болсон парламентын болон ерөнхийлөгчийн сонгуулийн мэдээллийг нэгтгэсэн. Их Британи, Израиль, Финлянд, Тувалу, Туркийн парламентын сонгуулийн тогтолцоо, оролцогчид, ирц, намуудын авсан санал, суудлын хуваарилалтыг танилцуулсан. Польш, Казахстан, Того, Узбекистан, Нигерийн ерөнхийлөгчийн сонгуулийн хугацаа, нэр дэвшигчид, санал хураалтын үр дүнг хүснэгтээр харуулсан.

Дэлхийн 187 орны парламентын бүрэн эрхийн хугацааг хүснэгтээр нэгтгэсэн. Улс орнуудыг хоёр, гурав, дөрөв, тав, зургаан жилийн бүрэн эрхийн хугацаатай байдлаар бүлэглэж, бүлэг тус бүрд хамаарах улсын нэр, тоог харуулсан. Хоёр танхимтай парламентын хувьд доод танхимын бүрэн эрхийн хугацааг ашигласныг тусгайлан тэмдэглэсэн.

Нийт 43 орны орон нутгийн сонгууль явуулах хугацаа, нутгийн удирдлагын байгууллагын бүрэн эрхийн хугацааг харьцуулсан. Улс тус бүрийн Үндсэн хууль, нутгийн удирдлагын болон сонгуулийн хууль дахь холбогдох заалтыг хүснэгтээр нэгтгэсэн. Орон нутгийн захирагчийг сонгох, томилох хэлбэр болон холбооны улсын муж, нэгжүүдийн хугацааны ялгааг мөн авч үзсэн.

БНМАУ-ын Ардын Их Хурлын үйл ажиллагааны үндсийг тогтоосон Үндсэн хууль, сонгуулийн дүрэм, регламент болон холбогдох хууль тогтоомжийг нэгтгэсэн. Төрийн эрх барих байгууллагын тогтолцоо, сонгуулийн шинэ систем, Ардын Их Хурлын бүрэн эрхийн хугацаа, чуулганы зохицуулалтыг тайлбарласан. Мөн Ардын Их Хурлын 1951-1990 оны болон орон нутгийн Ардын Депутатуудын Хурлын 1952-1990 оны сонгуулийн он дараалал, бүрэн эрхийн хугацааг хүснэгтээр харуулсан.

Эрхийн хэм хэмжээний албан ёсны болон албан ёсны бус тайлбар, тэдгээрийн төрөл, хэлбэр, эрх зүйн үйлчлэлийг тайлбарласан. ХБНГУ, ОХУ-ын шүүхүүдийн хууль тайлбарлах бүрэн эрх, Үндсэн хуулийн тайлбар болон шүүхийн практикийн тайлбарын зохицуулалтыг авч үзсэн. Хавсралтад Монгол Улсын Дээд шүүхийн 1993-2010 онд гаргасан хуулийн тайлбарын тоон мэдээлэл, 2008-2010 оны тайлбарын шийдвэрүүдийн жагсаалтыг оруулсан

Болгарын парламентын бүтэц, гишүүдийн тоо, бүрэн эрхийн хугацаа, сонгуулийн тойрог, санал хураалтын систем болон сонгогчид тавих шаардлагыг танилцуулсан. Парламентын 2009 оны сонгуулийн холимог тогтолцоо, суудал хуваарилалт, сонгуулийн босго, намуудын авсан санал болон сонгуулийн үр дүнг тоймлосон. Мөн Европын парламентын сонгуулийн ерөнхий мэдээлэл, Болгарын төлөөлөл болон намуудын санал, суудлын мэдээллийг оруулсан.