Турк, Мексик, Колумбын шүүхийн ерөнхий зөвлөл болон түүнтэй адил чиг үүрэгтэй байгууллагын эрх зүйн зохицуулалтыг судалсан. Байгууллагын бүтэц, бүрэлдэхүүн, гишүүдийг сонгох, томилох журам, бүрэн эрхийн хугацаа, үндсэн чиг үүргийг авч үзсэн. Мөн Латин Америкийн 15 улсын шүүхийн зөвлөлийн бүрэлдэхүүн, томилгоо, бүрэн эрх болон чиг үүргийг харьцуулсан хавсралт бэлтгэсэн.

БНСУ, Турк, Кыргызстаны Дээд шүүхийн ерөнхий шүүгч, шүүгч болон бусад шүүхийн шүүгчийн эрх зүйн байдлыг сонгосон асуудлуудын хүрээнд судалсан. Шүүгчид нэр дэвшигчийн боловсрол, нас, мэргэжлээр ажилласан хугацаа, мэргэшлийн сургалт болон шалгалтын шаардлагыг авч үзсэн. Мөн шүүгчийг сонгон шалгаруулах, нэр дэвшүүлэх, томилох, томилохоос татгалзах үндэслэл, холбогдох байгууллагын оролцоог улс тус бүрээр танилцуулсан.

Гадаадын зарим орны Үндсэн хуулийн шүүх болон прокурорын байгууллагын эрх зүйн байдал, төрийн байгууллагын тогтолцоонд эзлэх байр суурь, харьяаллыг харьцуулсан. Прокурорын байгууллагыг Хууль зүйн яаманд харьяалагдах, шүүх эрх мэдэлд багтах, атторнейн болон бие даасан тогтолцоотой байх хэлбэрээр ангилсан. Улс тус бүрийн Үндсэн хууль, холбогдох хуульд тулгуурлан байгууллагын бие даасан байдал, үндсэн чиг үүрэг, тайлагнах харилцааг хүснэгтээр танилцуулсан.

Төрийн тэргүүнээр сонгогдсон этгээд улс төрийн намын гишүүнчлэлээс татгалзах, гишүүнчлэлээ түдгэлзүүлэх болон намын үйл ажиллагаанд оролцохтой холбоотой гадаадын зохицуулалтыг судалсан. Ерөнхийлөгч зөвхөн төрийн тэргүүн байх, эсхүл Засгийн газрыг давхар тэргүүлэх байдлын ялгааг тайлбарласан. Улс орнуудын Үндсэн хууль дахь намын гишүүнчлэл, улс төрийн үйл ажиллагаа болон бусад албан тушаал хавсран эрхлэхтэй холбоотой заалтыг хүснэгтээр нэгтгэсэн.

Дэлхийн 40 орны Засгийн газрын бүтэц, бүрэлдэхүүнийг тодорхойлох, гишүүдийг томилох эрх зүйн зохицуулалтыг судалсан. Томилгоонд парламент, ерөнхийлөгч, хаан, ерөнхий сайд хэрхэн оролцдогийг ангилан хүснэгтээр нэгтгэсэн. Улс тус бүрийн Үндсэн хуулийн холбогдох заалтаар Засгийн газрыг бүрдүүлэх, сайд нарыг томилох, чөлөөлөх болон парламентын өмнө хариуцлага хүлээх зохицуулалтыг танилцуулсан.

Парламентын засаглалтай 29 орны парламентын гишүүнээр сонгогдох насны доод хязгаарыг харьцуулсан. Улс орнуудыг насны шаардлагаар нь бүлэглэж, улс бүрийн мэдээллийг тусад нь хүснэгтээр үзүүлсэн. Хоёр танхимтай парламентын хувьд доод танхимын гишүүнээр сонгогдох насны шаардлагыг авч, мэдээллийн үндэслэл болсон Үндсэн хууль болон сонгуулийн хуулийг ялган тэмдэглэсэн.

Энэхүү судалгаагаар Монгол Улсад малын хулгайн зөрчилд оногдуулах захиргааны шийтгэлийн эрх зүйн зохицуулалт, хэрэгжилтийн байдал, торгуулийн хэмжээ, эрүүгийн хариуцлагатай уялдах асуудлыг судалсан. Мөн 2004–2008 оны гэмт хэрэг, зөрчлийн статистик мэдээлэлд дүн шинжилгээ хийж, захиргааны шийтгэлийн хэмжээг нийгэм, эдийн засгийн нөхцөлд нийцүүлэх, хариуцлагын тогтолцоог боловсронгуй болгох санал, зөвлөмж боловсруулсан бодлогын судалгаа юм.

Их Британи, Энэтхэг, Австрали, АНУ, ОХУ-ын тэтгэвэр авагчдад зээл олгох зохицуулалт, санхүүгийн үйлчилгээний туршлагыг авч үзсэн. Тэтгэвэр барьцаалсан зээлийг тусгай хуулиар зохицуулдаг эсэх, банкны ердийн хэрэглээний зээл болон тэтгэвэр авагчдад зориулсан дэмжлэгийн хэлбэрүүдийг судалсан. Зээлийн нөхцөл, насны шаардлага, хүү, шимтгэл, тэтгэврийн урьдчилгаа авахтай холбоотой эрсдэл болон хэрэглэгчдэд өгсөн анхааруулгыг танилцуулсан.

нэхүү судалгаагаар Монгол Улсын Их Хурлын хуралдааны дэгийн эрх зүйн зохицуулалтын үүсэл, хөгжил, хууль тогтоомжийн өөрчлөлт, Үндсэн хуультай нийцсэн байдлыг судалсан. Мөн Франц, ХБНГУ, Турк зэрэг улсын парламентын хуралдааны дэгийн зохицуулалтыг харьцуулж, Үндсэн хуулийн цэцийн холбогдох шийдвэрүүдэд дүн шинжилгээ хийсэн. Улсын Их Хурлын хуралдааны дэг, Байнгын хорооны үйл ажиллагааны процессын зохицуулалтыг боловсронгуй болгох чиглэлээр дүгнэлт боловсруулсан эрх зүйн бодлогын судалгаа юм.

Монгол Улс, ХБНГУ, Норвеги, Их Британи, Ирландын хүүхэд асран хамгаалахтай холбоотой эцэг, эхийн эрх, үүрэг, хариуцлагыг судалсан. Хүүхдийг өсгөн хүмүүжүүлэх, тэжээн тэтгэх, боловсрол, эрүүл мэнд, аюулгүй байдлыг хангах үүрэг болон асран хамгаалагч тогтоох зохицуулалтыг авч үзсэн. Мөн гэрлэлт цуцалсны дараах эцэг, эхийн үүрэг, эцэг, эх байх эрхийг хязгаарлах, хасах болон хүүхдийн эрхийг хамгаалахад төр, шүүхийн оролцоог танилцуулсан.

Улс орнуудын ногдол ашгийн суутгалын татварын хувь хэмжээг хүснэгтээр нэгтгэсэн. Сонгосон 25 улсын ногдол ашиг, хүү, роялтигийн татварыг харьцуулж, нийт 162 улсын ногдол ашгийн татварыг хувь хэмжээ болон шатлалтай эсэхээр нь ангилсан. Мөн оршин суугч, оршин суугч бус этгээдэд ногдуулах татварын ялгаа, давхар татварын гэрээ болон татварын чөлөөлөлттэй холбоотой тайлбарыг оруулсан.

Энэхүү судалгаагаар Монгол Улс болон Франц Улсын Ашигт малтмалын тухай хуулийн эрх зүйн зохицуулалтыг харьцуулан судалсан. Ашигт малтмалын өмчлөл, ордын ангилал, тусгай зөвшөөрөл, олборлолтын гэрээ, байгаль орчны хамгаалалт, нөхөн сэргээлт, ашигт малтмалаас олох орлогын зохицуулалтын ижил болон ялгаатай талыг тодорхойлж, Монгол Улсын эрх зүйн зохицуулалтыг боловсронгуй болгоход анхаарах асуудлуудыг дүгнэсэн харьцуулсан эрх зүйн судалгаа юм.

Шударга бус өрсөлдөөн болон хөрөнгийн зах зээлтэй холбоотой зөрчил, гэмт хэргийг эрүүгийн болон салбарын хууль тогтоомжоор зохицуулах гадаадын туршлагыг судалсан. Үнэ тохиролцох, тендер будлиулах, зах зээл хуваах, давамгай байдлаа урвуулан ашиглах зэрэг үйлдэлд хүлээлгэх хариуцлагыг авч үзсэн. Үнэт цаас, төлбөрийн хэрэгслийг хуурамчаар үйлдэх, зах зээлд худал мэдээлэл түгээх, дотоод мэдээлэл ашиглан арилжаанд оролцохтой холбоотой зохицуулалтыг мөн танилцуулсан. Зөрчилд захиргааны болон эрүүгийн хариуцлага хүлээлгэх зохицуулалтын ялгааг холбогдох улсын хуулийн заалтаар харуулсан

Төвлөрлийг сааруулах онолын үндэслэл, захиргааны чиг үүрэг болон улс төрийн эрх мэдэл, хариуцлагыг шилжүүлэх хэлбэрүүдийг тайлбарласан. ОХУ-ын Санкт-Петербург, БНХАУ-ын Шанхай, БНСУ-ын Пусан, Канадын Торонто хот болон Казахстаны хөгжлийн төв, эдийн засгийн тусгай бүсийн туршлагыг авч үзсэн. Хөгжлийн шинэ төв байгуулахад төрийн бодлого, дэд бүтэц, тээврийн сүлжээ, хөрөнгө оруулалт болон орон нутгийн эрх мэдлийн хуваарилалт хэрхэн холбогдож байгааг судалсан. Судалгааны дүгнэлтэд Монгол Улсад хөгжлийн шинэ төв байгуулахтай холбоотой асуудлыг тусгасан.

Энэхүү судалгаагаар дэлхийн ураны нөөц, олборлолт, эрэлт, нийлүүлэлт, зах зээлийн үнэ, цөмийн эрчим хүчний хөгжлийн чиг хандлагыг судалсан. Мөн Олон улсын атомын энергийн агентлагийн аюулгүй ажиллагааны стандарт, Австрали, АНУ, Канад, ХБНГУ, Казахстаны эрх зүйн зохицуулалтыг харьцуулж, Монгол Улсын ураны нөөц, ашиглалтын боломж, цөмийн болон цацрагийн аюулгүй байдлын эрх зүйн орчныг боловсронгуй болгох санал, зөвлөмж боловсруулсан бодлогын судалгаа юм.

Казахстаны төрийн хяналт шалгалтын тухай хуулийн хэрэгжилтийн талаарх дугуй ширээний ярилцлагын тойм болон холбогдох хууль, бодлогын баримт бичгийн мэдээллийг нэгтгэсэн. Эрсдэлд суурилсан хяналт, бизнес эрхлэгчдийн эрх ашгийг хамгаалах, прокурорын хяналт, шалгалтын давхардал, төрийн байгууллагын шаардлага тогтоох эрхийн асуудлыг авч үзсэн. Хяналт, шалгалтын ойлголтын ялгаа, жижиг, дунд бизнест учрах ачаалал, хяналтын байгууллагын үйл ажиллагаа, хариуцлагын талаар хэлэлцүүлэгт оролцогчдын гаргасан санал, шүүмжлэлийг танилцуулсан. Мөн хяналт шалгалтын үр өгөөжийг үнэлэх асуудал болон ОХУ-ын холбогдох туршлагыг товч дурдсан.