Казахстаны газрын хэвлий ашиглах хууль тогтоомжийн хөгжлийг тоймлож, 2017 оны хуулийн зорилго, зарчим, үндсэн зохицуулалтыг танилцуулсан. 2010, 2017 оны хуулийг бүтэц, газрын хэвлий ашиглах эрх, ашиглагчийн эрх, үүрэг, төрийн байгууллагын тогтолцоо, удирдлагын хүрээнд харьцуулсан. Тусгай зөвшөөрөл, гэрээ, ашиглалтын нөхцөлийн тогтвортой байдал, геологийн мэдээллийн хүртээмж зэрэг өөрчлөлтийг авч үзсэн.

Казахстаны 2017 оны Татварын тухай хуульд тусгасан ашигт малтмалын нөөц ашигласны татварын хувь хэмжээг нэгтгэн танилцуулсан. Газрын тос, түүхий хий болон бусад ашигт малтмалын татварыг олборлолтын хэмжээ, бүтээгдэхүүний төрөл, дотоодын зах зээлд борлуулах нөхцөлөөр ялган харуулсан. Мөн эдгээр хувь хэмжээг 2008 оны хуулийн зохицуулалттай харьцуулсан.

АНУ, Израил, Финланд, БНХАУ, Сингапур, Нидерланд, Норвегийн оюуны өмчийн үнэлгээ, ашиглалт, эдийн засгийн эргэлтэд оруулахтай холбоотой эрх зүйн орчныг судалсан. Оюуны өмчийн үнэлгээнд хэрэглэдэг зардал, зах зээл, орлогод суурилсан аргачлалуудыг тайлбарласан. Зохиогчийн эрх, патент, барааны тэмдгийг ашиглах, бусдад шилжүүлэх, лицензийн гэрээ байгуулах болон эрхийг хамгаалах зохицуулалтыг авч үзсэн.

Монгол Улсын тамхины хэрэглээний тархалт, тамхин бүтээгдэхүүний дотоодын үйлдвэрлэл, импорт, зах зээлийн бүтэц, бүтээгдэхүүний чанар, стандарт болон төрийн хяналтын нөхцөл байдлыг авч үзсэн. Мөн тамхины хэрэглээг бууруулахад чиглэсэн хууль тогтоомж, татварын бодлого, зар сурталчилгааны хязгаарлалт, тэдгээрийн хэрэгжилтийг шинжилж, тамхины хяналтыг сайжруулах, хүүхэд, өсвөр үеийнхнийг тамхидалтаас урьдчилан сэргийлэх, хүн амын эрүүл мэндийг хамгаалах санал, зөвлөмж боловсруулсан.

ОХУ, БНСУ, Ирланд, Канадын түрээсийн харилцааг зохицуулсан хууль тогтоомжийг судалсан. Түрээсийн ерөнхий зохицуулалт болон эд хөрөнгө, орон сууц, барилга байгууламж, санхүүгийн түрээс зэрэг төрлүүдэд хамаарах тусгай зохицуулалтыг авч үзсэн. Түрээсийн гэрээний нөхцөл, талуудын эрх, үүрэг, төлбөр, бүртгэл, засвар үйлчилгээ, гэрээг дуусгавар болгох асуудлыг танилцуулсан.

Монгол Улсын гадаад, дотоодын хөрөнгө оруулалтын нөхцөл байдал, эрх зүйн зохицуулалт, хөрөнгө оруулагчдад үзүүлэх хөнгөлөлт, дэмжлэг болон бизнесийн орчны тулгамдсан асуудлыг авч үзсэн. БНХАУ, БНСУ, ОХУ-ын гадаадын хөрөнгө оруулалтын хууль тогтоомж, хөрөнгө оруулалттай аж ахуйн нэгжид тавих шаардлага, зохицуулалтын онцлогийг харьцуулж, Монгол Улсын гадаад, дотоодын хөрөнгө оруулагчдад эрх зүйн тэгш нөхцөл бүрдүүлэх, үндэсний хөрөнгө оруулалтыг дэмжих зохицуулалтыг боловсронгуй болгох шаардлагыг тодорхойлсон.

БНХАУ, Тайвань, ОХУ, Финланд, Нидерланд болон Европын холбооны нэмэгдсэн өртгийн албан татвар, түүний буцаан олголтын зохицуулалтыг авч үзсэн. Буцаан олголт авах нөхцөл, хүсэлт гаргах болон шийдвэрлэх хугацаа, илүү төлсөн татварыг дараагийн төлбөрт шилжүүлэн тооцох зэрэг асуудлыг танилцуулсан. Мөн НӨАТ-ын дэлхийн чиг хандлага, эдийн засгийн өсөлтөд үзүүлэх нөлөөний талаарх судалгааны мэдээллийг тоймлосон.

Австрали, Гүрж, Их Британи, БНСУ, Швед, Финландын төсвийн хяналт, шинжилгээний хараат бус байгууллагын эрх зүйн байдал, бүтэц, чиг үүргийг судалсан. Байгууллагын хараат бус байдал, удирдлага, хүний нөөц, санхүүжилт, мэдээлэл авах болон тайлагнах зохицуулалтыг авч үзсэн. Түүнчлэн Эдийн засгийн хамтын ажиллагаа, хөгжлийн байгууллагын гишүүн 26 улсын холбогдох байгууллагын мэдээллийг харьцуулан нэгтгэсэн.

Монгол Улсын хөрөнгийн үнэлгээний тогтолцоо, эдийн засаг, эрх зүйн орчин, үнэлгээний үйл ажиллагаанд тулгамдаж буй асуудлыг авч үзсэн. Улсын Их Хуралд өргөн барьсан Хөрөнгийн үнэлгээний тухай хуулийн төсөлд шинжилгээ хийж, ОХУ, Украин улсын эрх зүйн зохицуулалт болон АНУ, ХБНГУ, Их Британи, Израил, Малайз зэрэг улсын үнэлгээний мэргэжлийн байгууллагуудын туршлагыг харьцуулан, хөрөнгийн үнэлгээний эрх зүйн орчин, мэргэжлийн стандарт, хяналт, зохицуулалтыг боловсронгуй болгох санал, дүгнэлт боловсруулсан.

Төрийн өмчит болон төрийн өмчийн оролцоотой банкны хэрэгцээ шаардлага, эдийн засагт гүйцэтгэх үүрэг, үйл ажиллагааны онцлогийг авч үзсэн. ОХУ, БНХАУ, ХБНГУ, Казахстан, Япон, Бразил, Тайланд, БНСУ, Канад, Австралийн төрийн мэдлийн банкуудын үйл ажиллагаа, эрх зүйн зохицуулалтыг судалсан. Мөн гадаадын болон төрийн өмчит банкуудын банкны салбарт эзлэх байр суурийг харуулсан статистик мэдээллийг хавсаргасан.

Гадаадын орнуудын Үндсэн хуульд яам, сайдын нэр, тоо, чиг үүрэг, Засгийн газрын бүтцийг хэрхэн тусгасныг судалсан. Ерөнхий сайд яам байгуулах асуудлаар парламентад санал оруулах эрхтэй холбоотой зохицуулалтыг авч үзсэн. Мөн төрийн албаны төв байгууллагын нэр, эрх зүйн байдал, чиг үүргийг Үндсэн хуульд тодорхойлсон байдлыг харьцуулсан.

Парламентын гишүүний хуралдаанд оролцох үүрэг, сахилга, ёс зүйн зөрчилд хүлээлгэх хариуцлагын хэлбэрүүдийг судалсан. Санхүүгийн торгууль, сануулах, хуралдаанд оролцох болон үг хэлэх эрхийг хязгаарлах зэрэг арга хэмжээ, тэдгээрийг ногдуулах үндэслэл, эрх бүхий субъектыг авч үзсэн. Франц, Болгар, Словакийн холбогдох зохицуулалтыг дэлгэрүүлэн танилцуулсан.

Хотын мэрийн эрх зүйн статус, Засгийн газрыг орон нутагт төлөөлөх болон өөр албан тушаал давхар хаших асуудлыг судалсан. Улс орнуудын Үндсэн хууль, нутгийн удирдлагын хуульд хотын мэр, Засгийн газрын бүрэлдэхүүнийг хэрхэн тодорхойлсныг харьцуулсан. Хотын бонд, орон нутгийн зээллэг, дэд бүтцийн санхүүжилтийн олон улсын туршлага, эрх зүйн зохицуулалтыг тусад нь танилцуулсан.

Монгол Улс болон гадаадын зарим орны Ерөнхийлөгчийн Тамгын газрын бүтэц, зохион байгуулалт, үндсэн чиг үүргийг судалсан. Тамгын газрын удирдлага, зөвлөхүүд, ажилтнуудын эрх зүйн байдал, улс төрийн томилгоо, мэргэшсэн төрийн албаны харилцааг авч үзсэн. Улс төрийн төвийг сахих, үйл ажиллагааны залгамж чанарыг хадгалахтай холбоотой зохицуулалтыг танилцуулсан.

Хүний халдашгүй, чөлөөтэй байх эрхийн онолын үндэслэлийг эрх зүйн философи, жам ёсны эрхийн үүднээс авч үзсэн. Тус эрхийн бүрэлдэхүүн, хамрах хүрээ, хязгаарлалт болон Герман, ОХУ, АНУ-ын Үндсэн хууль, холбогдох хуулийн зохицуулалтыг судалсан. Эрх зүйн онол дахь “хувь хүн”, “бие хүн” гэсэн ойлголтын тодорхойлолт, ялгааг тайлбарласан.

Нэр төр, алдар хүнд, ажил хэргийн нэр хүндийн ойлголт, эмчийн ёс зүй, мэргэжлийн зөвшөөрлийн асуудлыг тайлбарласан. Эмч, эрүүл мэндийн ажилтны нэр төрд хэвлэл мэдээлэл, цахим сүлжээгээр халдсан үйлдлийг гадаадын орнуудад хэрхэн зохицуулдаг талаар судалсан. Гүтгэлэг, доромжлолд хүлээлгэх хариуцлага, нөхөн төлбөр, залруулга зэрэг арга хэмжээ болон Монголын холбогдох эрх зүйн орчныг танилцуулсан.