Монгол Улсын төрийн албан тушаалд тавих ерөнхий болон тусгай шаардлага, болзлын эрх зүйн зохицуулалт, тэдгээрийн ялгаа, хууль тогтоомжийн уялдаа холбоог шинжилсэн. Төрийн албаны тухай хууль болон бусад салбарын хууль тогтоомжид тусгагдсан шаардлага, болзлын давхардал, зөрчил, зохицуулалтын хийдлийг тодорхойлж, төрийн албан тушаалд томилох шалгуур, шаардлагыг нэгдмэл болгох, эрх зүйн орчныг боловсронгуй болгох санал, дүгнэлт боловсруулсан.

Монгол Улсад авлига, төрийн албаны хүнд суртал, төрийн албан хаагчийн ашиг сонирхлын зөрчлийн чиглэлээр өмнө хийгдсэн судалгаа, тайлан, ном зүйн мэдээллийг нэгтгэн тоймлосон. Авлигын тархалт, олон нийтийн хандлага, төрийн байгууллагын ил тод байдал, хүнд суртлын индекс, ашиг сонирхлын зөрчлийн шалтгаан, эрх зүйн зохицуулалтын асуудлыг авч үзэж, өмнөх судалгаануудын үр дүн, дүгнэлт, бодлогын зөвлөмжийг харьцуулан танилцуулсан.

урк, Их Британи, ХБНГУ-ын төрөөс олгодог одон, медаль, хүндэт цолны төрөл, шагнал олгох эрх бүхий байгууллага, нэр дэвшүүлэх журам, шалгуур болон эрх зүйн зохицуулалтыг харьцуулан авч үзсэн. Мөн шагналыг дагалдах мөнгөн болон эд хөрөнгийн урамшуулал, шагнал гардуулах зохион байгуулалт, улс орнуудын шагналын тогтолцооны онцлогийг нэгтгэн танилцуулсан.

ОХУ, Норвеги, БНСУ, Ирландын тэтгэврийн сангийн тогтолцоо, нөөц хөрөнгийг бүрдүүлэх, удирдах, хөрөнгө оруулалтаар өсгөх зохицуулалтыг судалсан. Улсын болон хувийн тэтгэврийн сангийн бүтэц, хөрөнгө байршуулах чиглэл, хяналтын асуудлыг авч үзсэн. Мөн Турк, Чилийн тэтгэврийн тогтолцоо болон бусад орны тэтгэврийн автомат оролцооны системийн туршлагыг танилцуулсан.

Оффшор бүсийн ойлголт, компани байгуулах, данс нээх, хөрөнгө эзэмших харилцаа болон оффшорын эсрэг олон улсын арга хэмжээг судалсан. Төрийн өндөр албан тушаалтны гадаад дахь данс, хөрөнгийг хязгаарлах, мэдээлэх зохицуулалтыг гадаадын орнуудын жишээгээр авч үзсэн. Макаогийн оффшор үйл ажиллагааны зохицуулалт, ОХУ-ын холбогдох хууль болон Украины хуулийн төслийн мэдээллийг дэлгэрүүлэн танилцуулсан.

Богдхан уулын дархан цаазат газрын газар ашиглалтын өнөөгийн байдал, газар олголт, ашиглалтын даац, байгаль орчны доройтол болон хууль тогтоомжийн хэрэгжилттэй холбоотой зөрчлийг авч үзсэн. Мөн газар ашиглах зөвшөөрөл, аялал жуулчлалын зориулалттай газрын ашиглалт, хууль бус барилгажилт, байгаль хамгааллын удирдлага, хяналтын тулгамдсан асуудлыг шинжилж, эрх зүйн зохицуулалт, хамгаалалтын менежмент, олон нийтийн оролцоог сайжруулах санал, зөвлөмж боловсруулсан.

Гадаадын улс орнууд парламентын нэгдсэн болон байнгын хорооны хуралдааныг телевиз, радио, интернэтээр дамжуулдаг практик, эрх зүйн зохицуулалтыг судалсан. Европын орнуудын мэдээллийг нэгтгэж, БНСУ, Турк, Тайланд, Сингапурын нэвтрүүлгийн зохион байгуулалт, зөвшөөрөл, хамрах хүрээг дэлгэрүүлэн танилцуулсан. Шууд нэвтрүүлгийн эерэг, сөрөг тал, бичлэг ашиглах хязгаарлалтыг авч үзэж, хуралдаан дамжуулдаг байдлыг харьцуулсан хүснэгт хавсаргасан.

АНУ, Нидерланд, Герман, Чех, Швед, Канад, Австрали, Шинэ Зеланд, Энэтхэгийн парламентын гишүүдэд зориулсан чиглүүлэх болон сэдэвчилсэн сургалтын туршлагыг судалсан. Сургалтын төрөл, агуулга, зохион байгуулагч байгууллага, зохион байгуулах хугацааг харьцуулан танилцуулсан. Шинэ гишүүдэд парламентын бүтэц, хууль тогтоох ажиллагаа, хуралдааны дэг, төсөв, хяналт, ёс зүйн талаар мэдээлэл өгөх хөтөлбөрүүд болон Олон улсын парламентын холбооны зөвлөмжийг хамруулсан.

Монгол Улсын парламентын хуралдааны дэгийг 1990 оноос хойш хууль, тогтоолоор баталж ирсэн өөрчлөлтийн түүхэн тоймыг танилцуулсан. Парламентын өөртөө засаглах эрх, хуралдааны дэгийн эрх зүйн онцлогийн талаарх онолын тайлбарыг авч үзсэн. Гадаадын улс орнууд хуралдааны дэгээ хууль эсвэл тогтоолоор баталдаг байдлыг холбогдох актын нэр, эх сурвалжийн хамт хүснэгтээр нэгтгэсэн.

АНУ, Герман, Турк, ОХУ, Эстони, Канад, Австрали, Их Британи, Ирландын парламентын судалгааны бүтээгдэхүүнийг нийтлэх, олон нийтэд хүргэх практикийг судалсан. Судалгааг цахим хуудас, мэдээллийн сан, хэвлэмэл бүтээл, номын сангаар дамжуулан ашиглуулах хэлбэр болон хүсэлт, зөвшөөрлийн зохицуулалтыг танилцуулсан. Мөн эх сурвалж дурдах шаардлага, зохиогчийн эрх, нийтэд нээлттэй болгохыг хязгаарласан мэдээллийн асуудлыг хамруулсан.

Турк, Казахстан, ОХУ, Финланд, Их Британи, Хорватын төрийн бодлого, шийдвэрийг олон нийтэд мэдээлэх эрх зүйн зохицуулалт, хэвлэл мэдээллийн хэрэгслийн оролцоог судалсан. Ерөнхийлөгч, парламент, Засгийн газрын хэвлэл мэдээлэл, олон нийттэй харилцах албадын чиг үүргийг танилцуулсан. Мэдээллийг хэвлэн нийтлэх, радио, телевизээр дамжуулах, цахим хуудсанд байршуулах, иргэдийн хүсэлтээр олгох хэлбэрүүдийг авч үзсэн.

Монгол Улс, АНУ, Их Британи, Австрали, БНСУ-ын ерөнхий боловсролын болон их, дээд сургуулийн сургалтын төлбөр тогтоох үндэслэл, аргачлал, эрх зүйн зохицуулалтыг судалсан. Төлбөрийн хэмжээг шийдвэрлэх байгууллагын эрх хэмжээ, төлбөр тооцоход харгалзах зардал, инфляц зэрэг үзүүлэлтийг авч үзсэн. Мөн суралцагчдад үзүүлэх тэтгэлэг, зээл, бусад дэмжлэгийн зохицуулалтыг танилцуулж, Монголын төрийн болон хувийн хэвшлийн сургуулиудын төлбөрийн мэдээллийг хавсаргасан.

Монгол Улсын бичил уурхай болон гар аргаар ашигт малтмал олборлох үйл ажиллагааны эрх зүйн зохицуулалт, хэрэгжилтийн байдал, байгаль орчин, хөдөлмөрийн аюулгүй байдал, нийгэм, эдийн засгийн тулгамдсан асуудлыг авч үзсэн. Мөн Бразил, Перу, Филиппин болон бусад улсын эрх зүйн зохицуулалт, туршлагыг харьцуулж, олборлогчдыг албажуулах, нөхөрлөлийн зохион байгуулалтыг дэмжих, нөхөн сэргээлт, татвар, тусгай зөвшөөрлийн тогтолцоог боловсронгуй болгох санал, зөвлөмж боловсруулсан.

Аж ахуйн нэгж, бизнес эрхлэгчдийн үйл ажиллагаанд хамаарах хууль тогтоомж болон тэдгээрийг хэрэгжүүлэхээр баталсан дүрэм, журам, зааврын мэдээллийг нэгтгэсэн. Хуулиар эрх олгосон заалтыг тухайн асуудлаар гаргасан Засгийн газар, яам, агентлаг болон бусад эрх бүхий байгууллагын шийдвэртэй холбон жагсаасан. Хөрөнгө оруулалт, жижиг, дунд үйлдвэрлэл, үйлдвэрлэлийн бодлогын эрх зүйн актуудыг тусад нь түүвэрлэн, цаашдын нарийвчилсан шинжилгээнд ашиглах лавлагаа бэлтгэсэн.

Ногдол ашгийн бодлогын ойлголт, ашиг хуваарилах болон компанид үлдээн хөрөнгө оруулах шийдвэрийн онолын үндэслэлийг тайлбарласан. Валтер, Гордоны загвар, үндсэн хөрөнгийн бүтцийн орлуулалтын онол, ногдол ашгийн үлдэгдлийн онол, Модиглиани-Милерийн теоремыг танилцуулсан. Эдгээр хандлагын хүрээнд ногдол ашиг, хөрөнгө оруулалт, хувьцааны үнэ цэнэ, хувьцаа эргүүлэн худалдан авах шийдвэрийн хамаарлыг авч үзсэн.

Монгол Улсын газрын нэгдмэл сангийн ангилал, газар өмчлөл, эзэмшил, ашиглалтын талаарх мэдээллийг 2015 оны тайланд тулгуурлан нэгтгэсэн. Иргэн, аж ахуйн нэгж, байгууллагад олгосон газрын хэмжээ, зориулалт, эрх эзэмшигчдийн тоо болон нийслэл, аймгуудын газар өмчлөлийн мэдээллийг танилцуулсан. Газрын тухай багц хуулийн төслийн талаарх мэдээлэл, газрын бодлого, зохицуулалтын хүрээнд хэрэгжүүлсэн ажлыг хамруулж, газрын нэгдмэл сангийн улсын нэгдсэн тайланг хавсаргасан.