Статистик болон өмнөх судалгаанд тулгуурлан малчдын боловсролын түвшин, малчин өрхийн хүүхдийн боловсролын үйлчилгээний хамрагдалт, мэргэшүүлэх сургалтын асуудлыг нэгтгэсэн. Малчдын боловсролын талаар төрөөс баримталсан бодлого, “Монгол мал” үндэсний хөтөлбөрийн хэрэгжилт, орон нутагт хийсэн ажил, тулгамдсан асуудлыг авч үзсэн.

2021 оны аравдугаар сарын 18–19-нд нийгмийн сүлжээ, хэвлэл, цахим сайт, телевизийн мэдээлэлд тулгуурлан олон нийтийн шүүмж, тулгамдсан асуудлыг тандан судалсан. Үнийн өсөлт, тээвэр, шатахууны хангамж, цар тахлын удирдлага, төсвийн зарцуулалт, боловсрол, эрүүл мэнд зэрэг асуудлыг давтамж, салбар, хариуцах байгууллагаар ангилан нэгтгэсэн.

Монгол Улсын нийгмийн болон эрүүл мэндийн даатгалын хамрагдалтыг нас, хүйс, даатгалын хэлбэрээр харьцуулан судалсан. 2016–2020 оны статистик мэдээлэлд тулгуурлан даатгуулагчдын тоо, албан журмын болон сайн дурын даатгалын хамрагдалт, шимтгэл төлөлт, даатгалын сангийн орлогын өөрчлөлтийг танилцуулсан.

Цар тахлын үед Монгол Улсын макро эдийн засаг, санхүүгийн зах зээл, хөдөлмөр эрхлэлт, өрхийн орлого болон нийгмийн бусад үзүүлэлтэд гарсан өөрчлөлтийг судалсан. Цар тахал гараагүй байх үеийн төсөөллийг 2020 оны бодит гүйцэтгэлтэй харьцуулан алдагдсан боломжийн зардлыг тооцож, төрөөс хэрэгжүүлсэн эдийн засаг, санхүү, нийгмийн хамгааллын арга хэмжээг тоймлон танилцуулсан.

Тавантолгойн бүлэг ордоос хилийн боомтууд руу чиглэсэн төмөр зам, автозамын бүтээн байгуулалт, хүчин чадал, эдийн засгийн боломжит үр ашгийг судалсан. Нүүрсний зах зээл, боомтын нөхцөл, тээврийн зардлыг авч үзэж, шинэ замуудыг ашигласнаар нүүрсний компаниудын ашиг, экспорт, төсвийн орлогод гарах өөрчлөлтийг төсөөлөн тооцоолж, төслүүдийн давуу, сул тал, боломж, эрсдэлийг шинжилсэн.

Ковид-19 цар тахлын үед НҮБ-ын гүйцэтгэсэн үүрэг, олон талт хамтын ажиллагаа, Аюулгүйн Зөвлөлийн үйл ажиллагааны талаарх судалгаа, шинжээчдийн байр суурийг нэгтгэсэн. Цар тахлын тогтвортой хөгжлийн зорилгод үзүүлэх нөлөө, Монгол Улсын хэрэгжилт, УИХ, Засгийн газрын үйл ажиллагаа болон парламентын оролцоог танилцуулсан.

Хөнгөн үйлдвэрлэлийн онцлог, хөгжилд нөлөөлөх хүчин зүйлс, Монгол Улсын үйлдвэрлэлийн бүтэц, салбарын үзүүлэлт, төрөөс хэрэгжүүлсэн бодлогыг судалсан. Итали, АНУ, БНХАУ, Их Британи, Энэтхэгийн туршлагыг санхүүжилт, технологи, инновац, түүхий эд, хүний нөөц, зах зээл зэрэг хүчин зүйлийн хүрээнд авч үзсэн.

Монгол Улсын нийгмийн даатгалын шимтгэлийн хувь хэмжээний өөрчлөлтийг даатгалын төрөл, ажил олгогч болон даатгуулагчийн төлөх хувиар ангилан танилцуулсан. Албан журмын болон сайн дурын даатгал, цар тахлын үеийн шимтгэлийн хөнгөлөлт, чөлөөлөлтийг авч үзэж, ОХУ, БНХАУ, Япон, Германы холбогдох мэдээлэлтэй харьцуулсан.

БНСУ, Казахстан улсын жижиг, дунд үйлдвэрлэлийг дэмжих төрийн бодлого, байгууллагын бүтэц, санхүүжилтийн тогтолцоог харьцуулан судалсан. Хөнгөлөлттэй зээл, зээлийн батлан даалт, лизинг, хөрөнгө оруулалтын сан зэрэг санхүүжилтийн хэрэгсэл, салбарын статистик мэдээлэл болон цар тахлын үед хэрэгжүүлсэн дэмжлэгийн арга хэмжээг хамруулсан.

Дэлхийн улс орнуудын эдийн засгийн уналтын цар хүрээг ДНБ, халдварын нас баралт, хязгаарлалтын үзүүлэлттэй харьцуулан тоймлосон. Төв Азийн эдийн засгийн нөхцөл, эмзэг байдал, төсөв, татварын хариу арга хэмжээ болон ОУВС-аас цар тахалд өртсөн орнуудад үзүүлсэн санхүүжилт, дэмжлэгийн мэдээллийг танилцуулсан.

Шилжилтийн эдийн засагтай, хөгжиж буй есөн улсын төсвийн шинэчлэлийн бодлого, хэрэгжүүлсэн арга хэмжээ, холбогдох баримт бичгийг судалсан. Хөтөлбөрт, гүйцэтгэлд болон үр дүнд суурилсан төсөвлөлт, дунд хугацааны зардлын хүрээ, төсвийн төлөвлөлт, төрийн санхүүгийн удирдлагын шинэчлэлийг улс орнуудын туршлагаар тайлбарласан.

Монгол Улсын 2000–2009 оны орон сууцны хангамж, инженерийн шугам сүлжээнд холбогдсон өрхийн тоо, шинээр ашиглалтад орсон орон сууц, орон сууцны сангийн өөрчлөлтийг шинжилсэн. Хот, суурин газрын усан хангамж, ариутгах татуургын байгууламжийн ашиглалт, эзэмшлийн хэлбэр, техникийн нөхцөл, эрх зүйн зохицуулалтын тулгамдсан асуудлыг авч үзсэн. Японы Засгийн газар, Азийн хөгжлийн банкны дэмжлэгтэй төслүүдийг дурдсан.

Монгол Улсын 2007–2009 онд хамгийн их хэмжээгээр болон үнийн дүнгээр импортолсон бараа бүтээгдэхүүнийг хүнс, хөдөө аж ахуй, барилгын материал, машин, тоног төхөөрөмж, бусад бараа гэсэн дөрвөн бүлэгт ангилан шинжилсэн. Импортын барааг дотоодод үйлдвэрлэх боломж, хүнсний үйлдвэрүүдийн бүтэц, үйлдвэрлэлийн чадавх, технологи, санхүүжилтийн хүндрэлүүдийг тодорхойлсон. Монгол Улсын 126 улсаас импортолсон барааны мэдээллийг ашигласан боловч гадаад орнуудын үйлдвэрлэлийн бодлогыг тусгайлан харьцуулж судлаагүй.

Монгол Улсын байгалийн цэвэр хүнсний бүтээгдэхүүний үйлдвэрлэл, хангамж, хүнсний чанарын хяналт, эрх зүйн зохицуулалт, үндэсний хөтөлбөрийн хэрэгжилтийг шинжилсэн. АНУ-ын мал аж ахуйн гаралтай хүнсний үйлдвэрлэл, БНХАУ-ын ногоон хүнсний ангилал, баталгаажуулалт, Чилийн жимсний үйлдвэрлэл, экспортын чанарын хяналтын туршлагыг авч үзсэн. Экологийн цэвэр бүтээгдэхүүний үйлдвэрлэл, үндэсний брэнд, хүнсний чанар, аюулгүй байдлыг хангах бодлогын зөвлөмж боловсруулсан.

Монгол Улсын хөдөө аж ахуйн салбарын 1970–2009 оны хөгжлийн хандлага, мал аж ахуй, газар тариалангийн үйлдвэрлэл, дотоодын нийт бүтээгдэхүүнд эзлэх хувь, мал сүргийн бүтэц, салбарын эдийн засагт гүйцэтгэсэн үүргийг шинжилсэн. Төрөөс хэрэгжүүлсэн бодлого, хөтөлбөр, гадаадын зээл, тусламжаар хэрэгжүүлсэн төслүүдийн мэдээллийг авч үзсэн. АНУ, БНСУ-ын дэмжлэгтэй төслүүдийг дурдсан боловч гадаад орнуудын хөдөө аж ахуйн бодлогыг бие даан харьцуулж судлаагүй.

Монгол Улсын үнэт цаасны бүртгэл, хадгаламж, клиринг-төлбөр тооцоо, кастодиан үйлчилгээний эрх зүйн зохицуулалт, зохион байгуулалт, тулгамдсан асуудлыг шинжилсэн. АНУ, ОХУ, ХБНГУ, Францын үнэт цаасны төвлөрсөн хадгаламж, төлбөр тооцооны байгууллагын тогтолцоо, үйл ажиллагааны туршлагыг харьцуулсан. Олон улсын стандартад нийцсэн төвлөрсөн хадгаламж, мэдээллийн нэгдсэн сүлжээ байгуулах, хөрөнгө оруулагчдын эрх ашгийг хамгаалах, зах зээлийн эрсдэлийг бууруулах санал, зөвлөмж боловсруулсан.