Телемедицин үйлчилгээний зохицуулалтын талаарх олон улсын зөвлөмж болон БНХАУ, Филиппин, БНСУ, Малайз, Австрали, ОХУ, Японы туршлагыг судалсан. Цахим оношилгоо, эмнэлгийн үйлчилгээний хамрах хүрээ, үйлчилгээ үзүүлэгчийн зөвшөөрөл, өвчтөний эрх, зөвшөөрөл авах ажиллагаа, мэдээллийн нууцлал, оролцогчдын үүрэг, хариуцлагыг харьцуулан авч үзсэн.

Гэр бүлийн асуудал хариуцсан төрийн байгууллагын тогтолцоо, хүүхдийн тэтгэлгийг зохицуулах төрийн оролцоо, гадаадын иргэн, харьяалалгүй хүнтэй гэрлэх харилцааг судалсан. Эстони, Англи, Филиппин, БНСУ, Австрали, ОХУ-ын туршлагыг Монголын нөхцөл байдалтай харьцуулж, гэр бүл, хүүхдийн эрхтэй холбоотой олон улсын баримт бичгийг танилцуулсан.

Хүний удмын сан, генийн сан, цус ойртолт, угийн бичгийн талаарх ойлголтыг тайлбарлаж, удмын сан, нөхөн үржихүйтэй холбоотой бодлого, эрх зүйн баримт бичгийг судалсан. Гэрлэлтийн хязгаарлалт, генетикийн мэдээлэл ба хүний эрх, иргэний бүртгэл, угийн бичгийн цахим сан, цагаачлалын бодлогын асуудлыг олон улсын болон Монголын зохицуулалттай холбон авч үзсэн.

Япон, БНСУ, Канадын Онтарио муж, Шинэ Зеланд, Эстонийн эмч, эмнэлгийн мэргэжилтний эрх зүйн байдлын зохицуулалтыг судалсан. Мэргэжлийн тусгай зөвшөөрөл, бүртгэл, шалгалт, сургалт, эрх, үүрэг, хариуцлага, мэргэжлийн байгууллагын оролцоог харьцуулж, эрүүл мэндийн хүний нөөц, ёс зүйн талаарх олон улсын зөвлөмжийг тоймлосон.

Өвчтөний эрхийн талаарх олон улсын баримт бичиг болон Гүрж, Израил, Литва, Шотланд, Германы эрх зүйн зохицуулалтыг судалсан. Өвчтөн мэдээлэл авах, эмчилгээнд зөвшөөрөл өгөх, хувийн нууцаа хамгаалуулах, эмнэлгийн бүртгэлтэй танилцах, тусламж үйлчилгээ авах, гомдол гаргах, нөхөн төлбөр шаардах эрхийн зохицуулалтыг харьцуулсан.

Нийгмийн эрүүл мэндийн хууль боловсруулах талаарх ДЭМБ-ын зөвлөмж болон Канад, БНСУ, Их Британи, Лаос, Малавийн эрх зүйн зохицуулалтыг судалсан. Хуулиудын бүтэц, хамрах хүрээ, өвчнөөс урьдчилан сэргийлэх, эрүүл мэндийг дэмжих арга хэмжээ, төрийн болон төрийн бус байгууллагын эрх, үүрэг, хариуцлагыг харьцуулсан.

Эм, эмнэлгийн хэрэгслийн зохицуулалтын тогтолцоо, аюулгүй байдлын хяналт, импорт, нэгдсэн худалдан авалт, төрийн оролцооны талаарх олон улсын зөвлөмжийг танилцуулсан. Шинэ Зеланд, Чили, Латви, Турк, БНСУ, ОХУ, Японы хууль тогтоомжийг харьцуулж, эм, эмнэлгийн хэрэгслийн эргэлт, чанар, хэрэглээтэй холбоотой зохицуулалтыг авч үзсэн.

Төсвийг тэнцвэртэй батлах, төсвийн алдагдал, өр, зарлагыг хязгаарлах зарчмыг Үндсэн хууль болон бусад хуулиар зохицуулсан туршлагыг судалсан. Үндсэн хуулийн эдийн засаг, нийтийн санхүүгийн суурь ойлголтыг тайлбарлаж, АНУ, Европын холбоо, Словак, Зүүн Өмнөд Азийн орнуудын төсвийн дүрэм, хязгаарлалтын зохицуулалтыг авч үзсэн.

АНУ, Казахстан, ОХУ, БНХАУ-ын худалдааны асуудал хариуцсан төв байгууллагын тогтолцоо, бүтэц, чиг үүрэг, байгууллага хоорондын уялдааг судалсан. Эдгээр улсын гадаад худалдааны бодлого, экспортыг дэмжих болон импортоос дотоодын зах зээлээ хамгаалах арга хэмжээг авч үзэж, худалдааг чөлөөлөх, хамгаалах бодлогын хэрэглээг харьцуулсан

Монгол Улсын гадаад худалдаа, гадаадын хөрөнгө оруулалтын нөхцөл байдал, нөөц боломж, бизнесийн орчны үзүүлэлтүүдийг тоймлосон. Холбогдох хууль тогтоомж, бодлогын баримт бичиг, худалдаа, хөрөнгө оруулалтыг дэмжих байгууллагуудын чиг үүрэг, олон улсын туршлагыг нэгтгэж, хөгжлийн бодлоготой уялдуулсан санал, зөвлөмжийг тусгасан.

Хөдөө аж ахуйн гаралтай бараа, түүхий эдийн биржийн тухай хуулийн төслийн үзэл баримтлал, арилжааны механизм, хяналт, зохицуулалт, оролцогчдын эрх, үүрэг, хариуцлагын тогтолцоог шинжилсэн. Олон улсын таваарын биржийн арилжааны нийтлэг зарчим, үүсмэл санхүүгийн хэрэгслийн зохицуулалтад тулгуурлан биржийн сонгодог болон холимог загварыг санал болгосон.

Монгол Улсын Ашигт малтмалын тухай хууль болон Австралийн Өмнөд Австрали мужийн Уул уурхайн тухай хуулийн өмчлөл, тусгай зөвшөөрөл, зөвшөөрөл эзэмшигчийн үүрэг, гэрээ, байгаль орчны хамгаалал, нөхөн сэргээлт, орлогын зохицуулалтыг харьцуулсан. Мөн Шинэ Өмнөд Уэльс, Квинсланд, Тасмани, Виктория, Баруун Австрали мужуудын хууль тогтоомжийн онцлогийг тоймлож, орон нутгийн иргэдтэй зөвлөлдөх, уул уурхайн үйл ажиллагаанд хяналт тавих туршлагыг авч үзсэн.

Монгол Улсын 1994, 1997, 2006 оны Ашигт малтмалын тухай хуулиудын ордын ангилал, өмчлөл, тусгай зөвшөөрөл, гэрээ, байгаль орчны нөхөн сэргээлтийн зохицуулалтыг харьцуулсан. ОХУ, Чили, Перу, Казахстан, Венесуэл зэрэг улсын уул уурхайн хөрөнгө оруулалтын гэрээ, ашигт малтмалын нөөц ашигласны төлбөр, гэрээг шинэчлэх туршлагыг жишээлэн авч үзсэн. Төрийн хяналт, лицензийн шалгуур, хөрөнгө оруулалтын гэрээ, нөхөн сэргээлтийн зохицуулалтыг боловсронгуй болгох зөвлөмж боловсруулсан.

Парламентын ёс зүйн хяналтын дотоод, гадаад, хослуулсан зохицуулалтын загварыг тайлбарлаж, Польш, Ирланд, БНСУ, АНУ, Герман, Их Британи, Францын туршлагыг судалсан. Ёс зүйн хороо, комиссар болон холбогдох байгууллагын бүтэц, эрх хэмжээ, томилгоо, гомдол хянан шийдвэрлэх ажиллагаа, хариуцлага тооцох зохицуулалтыг танилцуулсан.

Парламентын ажлын албаны даргын албан тушаалын нэршлийг 32 улсын мэдээллээр тоймлож, арван улсын ажлын албаны удирдлагын чиг үүргийг дэлгэрүүлэн танилцуулсан. Парламентын удирдлагад зөвлөх, хуралдааны бэлтгэл хангах, захиргаа, хүний нөөц, төсөв, өмч хөрөнгө удирдах, тэмдэглэл хөтлөх, байгууллага хоорондын харилцааг зохицуулах үүргийг харьцуулсан.

ОХУ-ын Төрийн Думын Тамгын газрын Хуулийн хэлтсээс хуулийн болон бусад шийдвэрийн төсөлд дүгнэлт гаргахтай холбоотой регламентын заалтуудыг нэгтгэсэн. Төслийн хууль тогтоомжид нийцэх байдал, хууль зүйн техник, хэл зүйн шинжилгээ, дүгнэлтийн агуулга, баталгаажуулалт болон хэлэлцүүлгийн үе шат бүрд дүгнэлт хавсаргах зохицуулалтыг танилцуулсан.