Казахстан, Швейцар, ОХУ, Финландын усан замын тээврийн аюулгүй байдлыг зохицуулсан эрх зүйн орчныг судалсан. Хөлөг онгоцны бүртгэл, техникийн шаардлага, аюулгүй ажиллагаа, хяналт шалгалт болон эрх бүхий байгууллагын чиг үүргийг авч үзсэн. Мөн Кени, Танзани, Угандагийн дунд орших Виктория нуурын тээврийн аюулгүй байдлыг зохицуулсан хуулийг танилцуулсан.

Газрын тосны олборлолтоос бүрдэх орлогыг төв болон орон нутгийн төсөвт хуваарилах тогтолцоог ОХУ, АНУ, БНХАУ зэрэг таван улсын туршлагад тулгуурлан судалсан. Орлогыг орон нутгийн төсөвт шууд төвлөрүүлэх, төвлөрсөн төсвөөс шилжүүлэх болон тодорхой шалгуур үзүүлэлтээр хуваарилах хэлбэрүүдийг тайлбарласан. Татвар, төлбөрийн орлогын эх үүсвэр, хуваарилалтын хувь хэмжээ, олборлолт явагдаж буй бүс нутгийн хүртэх орлогын зохицуулалтыг авч үзсэн.

Монгол Улсын уул уурхайн салбарын нөхөн сэргээлтийн өнөөгийн байдал, эрх зүйн зохицуулалт, хэрэгжилтийн хүндрэл болон байгаль орчныг хамгаалахад иргэдийн оролцоог хангах асуудлыг авч үзсэн. Канад, Австрали, Энэтхэг зэрэг улсын туршлага, Аархусын конвенцийн зохицуулалтыг харьцуулж, байгаль орчны мэдээллийн ил тод байдал, шийдвэр гаргах үйл явц дахь олон нийтийн оролцоо, зөрчигдсөн эрхээ хамгаалуулах боломжийг шинжилсэн. Мөн уул уурхайн нөхөн сэргээлтийн хариуцлага, хяналтын тогтолцоог сайжруулах, байгаль орчны шударга ёсыг хангах эрх зүйн зохицуулалтыг боловсронгуй болгох санал, зөвлөмж боловсруулсан.

Монгол Улсын эрчим хүчний салбарын өнөөгийн байдал, цахилгаан, дулааны үйлдвэрлэл, хэрэглээ, эрчим хүчний системийн хүчин чадал, санхүүгийн нөхцөл байдал болон эрх зүйн зохицуулалтыг авч үзсэн. Эрчим хүчний эх үүсвэрийн дутагдал, тоног төхөөрөмжийн шинэчлэл, үнэ тариф, өр авлага, сэргээгдэх эрчим хүчний хөгжлийн тулгамдсан асуудлыг шинжилж, 2009–2021 он болон түүнээс хойших хугацаанд салбарын найдвартай ажиллагааг хангах, дэд бүтцийг өргөжүүлэх, эрчим хүчний экспортыг нэмэгдүүлэх бодлогын зорилт, хөгжлийн чиглэлийг тодорхойлсон.

Уул уурхайн салбар дахь гадаадын хөрөнгө оруулалтыг татах төрийн бодлого, эрх зүйн зохицуулалт, татварын тогтолцоо, хөрөнгө оруулалтын гэрээ болон санхүүжилтийн нөхцөлийг харьцуулан авч үзсэн. Австрали, АНУ, Франц, Канад, ӨАБНУ, Чили, Перу, ОХУ, Киргизстан зэрэг улсын уул уурхайн хөрөнгө оруулалтын бодлого, тусгай зөвшөөрөл, татварын хөнгөлөлт, тогтвортой байдлын гэрээний туршлагыг шинжилж, хөрөнгө оруулалтын таатай орчин бүрдүүлэхэд эрх зүйн тогтвортой байдал, ил тод засаглал, шударга хяналт болон байгаль орчны хамгаалалтын ач холбогдлыг тодорхойлсон.

Казахстаны газрын хэвлий ашиглах хууль тогтоомжийн хөгжлийг тоймлож, 2017 оны хуулийн зорилго, зарчим, үндсэн зохицуулалтыг танилцуулсан. 2010, 2017 оны хуулийг бүтэц, газрын хэвлий ашиглах эрх, ашиглагчийн эрх, үүрэг, төрийн байгууллагын тогтолцоо, удирдлагын хүрээнд харьцуулсан. Тусгай зөвшөөрөл, гэрээ, ашиглалтын нөхцөлийн тогтвортой байдал, геологийн мэдээллийн хүртээмж зэрэг өөрчлөлтийг авч үзсэн.

Казахстаны 2017 оны Татварын тухай хуульд тусгасан ашигт малтмалын нөөц ашигласны татварын хувь хэмжээг нэгтгэн танилцуулсан. Газрын тос, түүхий хий болон бусад ашигт малтмалын татварыг олборлолтын хэмжээ, бүтээгдэхүүний төрөл, дотоодын зах зээлд борлуулах нөхцөлөөр ялган харуулсан. Мөн эдгээр хувь хэмжээг 2008 оны хуулийн зохицуулалттай харьцуулсан.

АНУ, Израил, Финланд, БНХАУ, Сингапур, Нидерланд, Норвегийн оюуны өмчийн үнэлгээ, ашиглалт, эдийн засгийн эргэлтэд оруулахтай холбоотой эрх зүйн орчныг судалсан. Оюуны өмчийн үнэлгээнд хэрэглэдэг зардал, зах зээл, орлогод суурилсан аргачлалуудыг тайлбарласан. Зохиогчийн эрх, патент, барааны тэмдгийг ашиглах, бусдад шилжүүлэх, лицензийн гэрээ байгуулах болон эрхийг хамгаалах зохицуулалтыг авч үзсэн.

Монгол Улсын тамхины хэрэглээний тархалт, тамхин бүтээгдэхүүний дотоодын үйлдвэрлэл, импорт, зах зээлийн бүтэц, бүтээгдэхүүний чанар, стандарт болон төрийн хяналтын нөхцөл байдлыг авч үзсэн. Мөн тамхины хэрэглээг бууруулахад чиглэсэн хууль тогтоомж, татварын бодлого, зар сурталчилгааны хязгаарлалт, тэдгээрийн хэрэгжилтийг шинжилж, тамхины хяналтыг сайжруулах, хүүхэд, өсвөр үеийнхнийг тамхидалтаас урьдчилан сэргийлэх, хүн амын эрүүл мэндийг хамгаалах санал, зөвлөмж боловсруулсан.

ОХУ, БНСУ, Ирланд, Канадын түрээсийн харилцааг зохицуулсан хууль тогтоомжийг судалсан. Түрээсийн ерөнхий зохицуулалт болон эд хөрөнгө, орон сууц, барилга байгууламж, санхүүгийн түрээс зэрэг төрлүүдэд хамаарах тусгай зохицуулалтыг авч үзсэн. Түрээсийн гэрээний нөхцөл, талуудын эрх, үүрэг, төлбөр, бүртгэл, засвар үйлчилгээ, гэрээг дуусгавар болгох асуудлыг танилцуулсан.

Монгол Улсын гадаад, дотоодын хөрөнгө оруулалтын нөхцөл байдал, эрх зүйн зохицуулалт, хөрөнгө оруулагчдад үзүүлэх хөнгөлөлт, дэмжлэг болон бизнесийн орчны тулгамдсан асуудлыг авч үзсэн. БНХАУ, БНСУ, ОХУ-ын гадаадын хөрөнгө оруулалтын хууль тогтоомж, хөрөнгө оруулалттай аж ахуйн нэгжид тавих шаардлага, зохицуулалтын онцлогийг харьцуулж, Монгол Улсын гадаад, дотоодын хөрөнгө оруулагчдад эрх зүйн тэгш нөхцөл бүрдүүлэх, үндэсний хөрөнгө оруулалтыг дэмжих зохицуулалтыг боловсронгуй болгох шаардлагыг тодорхойлсон.

БНХАУ, Тайвань, ОХУ, Финланд, Нидерланд болон Европын холбооны нэмэгдсэн өртгийн албан татвар, түүний буцаан олголтын зохицуулалтыг авч үзсэн. Буцаан олголт авах нөхцөл, хүсэлт гаргах болон шийдвэрлэх хугацаа, илүү төлсөн татварыг дараагийн төлбөрт шилжүүлэн тооцох зэрэг асуудлыг танилцуулсан. Мөн НӨАТ-ын дэлхийн чиг хандлага, эдийн засгийн өсөлтөд үзүүлэх нөлөөний талаарх судалгааны мэдээллийг тоймлосон.

Австрали, Гүрж, Их Британи, БНСУ, Швед, Финландын төсвийн хяналт, шинжилгээний хараат бус байгууллагын эрх зүйн байдал, бүтэц, чиг үүргийг судалсан. Байгууллагын хараат бус байдал, удирдлага, хүний нөөц, санхүүжилт, мэдээлэл авах болон тайлагнах зохицуулалтыг авч үзсэн. Түүнчлэн Эдийн засгийн хамтын ажиллагаа, хөгжлийн байгууллагын гишүүн 26 улсын холбогдох байгууллагын мэдээллийг харьцуулан нэгтгэсэн.

Монгол Улсын хөрөнгийн үнэлгээний тогтолцоо, эдийн засаг, эрх зүйн орчин, үнэлгээний үйл ажиллагаанд тулгамдаж буй асуудлыг авч үзсэн. Улсын Их Хуралд өргөн барьсан Хөрөнгийн үнэлгээний тухай хуулийн төсөлд шинжилгээ хийж, ОХУ, Украин улсын эрх зүйн зохицуулалт болон АНУ, ХБНГУ, Их Британи, Израил, Малайз зэрэг улсын үнэлгээний мэргэжлийн байгууллагуудын туршлагыг харьцуулан, хөрөнгийн үнэлгээний эрх зүйн орчин, мэргэжлийн стандарт, хяналт, зохицуулалтыг боловсронгуй болгох санал, дүгнэлт боловсруулсан.

Төрийн өмчит болон төрийн өмчийн оролцоотой банкны хэрэгцээ шаардлага, эдийн засагт гүйцэтгэх үүрэг, үйл ажиллагааны онцлогийг авч үзсэн. ОХУ, БНХАУ, ХБНГУ, Казахстан, Япон, Бразил, Тайланд, БНСУ, Канад, Австралийн төрийн мэдлийн банкуудын үйл ажиллагаа, эрх зүйн зохицуулалтыг судалсан. Мөн гадаадын болон төрийн өмчит банкуудын банкны салбарт эзлэх байр суурийг харуулсан статистик мэдээллийг хавсаргасан.

Гадаадын орнуудын Үндсэн хуульд яам, сайдын нэр, тоо, чиг үүрэг, Засгийн газрын бүтцийг хэрхэн тусгасныг судалсан. Ерөнхий сайд яам байгуулах асуудлаар парламентад санал оруулах эрхтэй холбоотой зохицуулалтыг авч үзсэн. Мөн төрийн албаны төв байгууллагын нэр, эрх зүйн байдал, чиг үүргийг Үндсэн хуульд тодорхойлсон байдлыг харьцуулсан.