Монгол Улсын уул уурхайн стратегийн ордуудаас бүрдэх орлогыг Хүний хөгжил сангаар дамжуулан иргэдэд хуваарилах боломж, санхүүжилтийн эх үүсвэр болон эдийн засагт үзүүлэх нөлөөллийг үнэлсэн. Иргэн бүрт 1.5 сая төгрөгийг бэлэн болон бэлэн бус хэлбэрээр олгох бодлогын хувилбаруудыг харьцуулж, өрхийн орлого, зарлага, хэрэглээ, дотоодын үйлдвэрлэл, гадаад худалдаа, банкны хадгаламж, инфляцид үзүүлэх эерэг, сөрөг үр дагаврыг тооцоолон, эдийн засгийн тогтвортой байдлыг хангах бодлогын боломжит шийдлийг тодорхойлсон.

Гадаадын орнуудын Үндсэн хуульд яам, сайдын нэр, тоо, чиг үүрэг, Засгийн газрын бүтцийг хэрхэн тусгасныг судалсан. Ерөнхий сайд яам байгуулах асуудлаар парламентад санал оруулах эрхтэй холбоотой зохицуулалтыг авч үзсэн. Мөн төрийн албаны төв байгууллагын нэр, эрх зүйн байдал, чиг үүргийг Үндсэн хуульд тодорхойлсон байдлыг харьцуулсан.

Парламентын гишүүний хуралдаанд оролцох үүрэг, сахилга, ёс зүйн зөрчилд хүлээлгэх хариуцлагын хэлбэрүүдийг судалсан. Санхүүгийн торгууль, сануулах, хуралдаанд оролцох болон үг хэлэх эрхийг хязгаарлах зэрэг арга хэмжээ, тэдгээрийг ногдуулах үндэслэл, эрх бүхий субъектыг авч үзсэн. Франц, Болгар, Словакийн холбогдох зохицуулалтыг дэлгэрүүлэн танилцуулсан.

Хотын мэрийн эрх зүйн статус, Засгийн газрыг орон нутагт төлөөлөх болон өөр албан тушаал давхар хаших асуудлыг судалсан. Улс орнуудын Үндсэн хууль, нутгийн удирдлагын хуульд хотын мэр, Засгийн газрын бүрэлдэхүүнийг хэрхэн тодорхойлсныг харьцуулсан. Хотын бонд, орон нутгийн зээллэг, дэд бүтцийн санхүүжилтийн олон улсын туршлага, эрх зүйн зохицуулалтыг тусад нь танилцуулсан.

Монгол Улс болон гадаадын зарим орны Ерөнхийлөгчийн Тамгын газрын бүтэц, зохион байгуулалт, үндсэн чиг үүргийг судалсан. Тамгын газрын удирдлага, зөвлөхүүд, ажилтнуудын эрх зүйн байдал, улс төрийн томилгоо, мэргэшсэн төрийн албаны харилцааг авч үзсэн. Улс төрийн төвийг сахих, үйл ажиллагааны залгамж чанарыг хадгалахтай холбоотой зохицуулалтыг танилцуулсан.

Хүний халдашгүй, чөлөөтэй байх эрхийн онолын үндэслэлийг эрх зүйн философи, жам ёсны эрхийн үүднээс авч үзсэн. Тус эрхийн бүрэлдэхүүн, хамрах хүрээ, хязгаарлалт болон Герман, ОХУ, АНУ-ын Үндсэн хууль, холбогдох хуулийн зохицуулалтыг судалсан. Эрх зүйн онол дахь “хувь хүн”, “бие хүн” гэсэн ойлголтын тодорхойлолт, ялгааг тайлбарласан.

Нэр төр, алдар хүнд, ажил хэргийн нэр хүндийн ойлголт, эмчийн ёс зүй, мэргэжлийн зөвшөөрлийн асуудлыг тайлбарласан. Эмч, эрүүл мэндийн ажилтны нэр төрд хэвлэл мэдээлэл, цахим сүлжээгээр халдсан үйлдлийг гадаадын орнуудад хэрхэн зохицуулдаг талаар судалсан. Гүтгэлэг, доромжлолд хүлээлгэх хариуцлага, нөхөн төлбөр, залруулга зэрэг арга хэмжээ болон Монголын холбогдох эрх зүйн орчныг танилцуулсан.

Багшийн хөгжлийг дэмжих эрх зүйн орчин, мэргэжлийн шаардлага, стандарт, нийгмийн баталгаа, цалин, хөдөлмөрийн үнэлгээний асуудлыг судалсан. Тусгаар улсуудын хамтын нөхөрлөлийн орнуудын загвар хууль болон Польш, Филиппин, БНХАУ, БНСУ, Чехийн туршлагыг танилцуулсан. Олон улсын хөдөлмөрийн байгууллага, ЮНЕСКО-гийн багшийн статусын зөвлөмж, багшийн цалин хөлсний шинэчлэлийн мэдээллийг хамруулсан.

Их сургуулийн үйл ажиллагааг боловсролын суурь хууль, дээд боловсролын хууль, бие даасан болон тухайлсан сургуулийн нэрлэсэн хуулиар зохицуулах хувилбаруудыг судалсан. Канад, Эстони, Финланд, БНСУ, ОХУ, Ирланд, Малайзын зохицуулалтыг дэлгэрүүлэн танилцуулсан. Их сургуулийн статус, удирдлага, академик эрх чөлөө, бие даасан байдал, санхүүжилт, сургалт, судалгаа, хяналтын асуудлыг авч үзсэн.

Сайн дурын ажил, үйлчилгээний ойлголт, үүсэл хөгжил болон эрх зүйн зохицуулалтын үндсэн хувилбаруудыг танилцуулсан. Люксембург, Герман, БНСУ, Филиппин, Македон, Чехийн сайн дурын үйл ажиллагааны хууль, зохион байгуулалтын туршлагыг судалсан. Оролцогч талуудын эрх, үүрэг, хариуцлага, урамшуулал, хамгаалалт, татвар болон үйл ажиллагааг дэмжих байгууллагын асуудлыг хамруулсан.

Худалдааны бодлого, түүнийг хэрэгжүүлэх тарифын болон тарифын бус арга хэрэгсэл, олон талт худалдааны зохицуулалтыг танилцуулсан. Дэлхийн худалдааны байгууллагын хүрээнд тогтоосон худалдааны зарчим, хэлэлцээрийн асуудлыг авч үзсэн. ОХУ, Казахстан, Япон, БНХАУ, БНСУ, Чех, Германы дотоод, гадаад худалдааны үйл ажиллагааг зохицуулсан хуулиудын бүтэц, агуулгыг судалсан.

Хог хаягдлыг дахин боловсруулах үйлдвэрлэлийн нөхцөл байдал, төрийн оролцоо, дэмжлэг, хэрэгжүүлж буй төсөл, эрх зүйн орчны мэдээллийг нэгтгэсэн. Нүүрс баяжуулах үйлдвэрлэл, нүүрсний худалдааны нөхцөл, холбогдох зохицуулалтыг танилцуулсан. Улаанбаатарын авто зам, давхар зам, тусгай замын автобус, метро, рейлбус зэрэг тээврийн дэд бүтцийн төслүүдийн мэдээллийг хамруулсан.

Мөнгө хүүлэлтийн ойлголт, зээлийн хүүг хязгаарлах эрх зүйн зохицуулалтыг судалсан. Европын холбооны гишүүн орнуудын зээлийн хүүгийн дээд хэмжээ, түүнийг тогтоох арга, эрх бүхий байгууллага, хариуцлагын механизмыг дэлгэрүүлэн танилцуулсан. Хүүгийн хязгаарлалтын эерэг, сөрөг үр дагавар болон санхүүгийн хэрэглэгчийг хамгаалах арга хэмжээний талаарх өмнөх судалгааны мэдээллийг хамруулсан.

Үндсэн хуулийн өөрчлөлт, төрийн болон орон нутгийн бодлогын асуудлаар зөвлөлдөх санал асуулга зохион байгуулсан туршлагыг судалсан. Санал асуулгын сэдэв, зохион байгуулагч, хамрах түвшин, хэлбэр, давуу болон сул талын мэдээллийг нэгтгэсэн. Монголын 2017 оны туршлага, холбогдох эрх зүйн орчны мэдээлэл болон гадаадын Үндсэн хуульд нэмэлт, өөрчлөлт оруулах зохицуулалтын лавлагааг хамруулсан.

Европ, Азийн орнууд парламентын нэгдсэн болон байнгын хорооны хуралдааныг олон нийтэд дамжуулах хэлбэр, зохицуулалтыг судалсан. Парламентын тусгай суваг, олон нийтийн болон арилжааны телевиз, радио, цахим хуудас, нийгмийн сүлжээний хэрэглээг авч үзсэн. Хуралдааныг бүрэн, хэсэгчлэн, тогтмол эсвэл онцгой тохиолдолд дамжуулах ялгаа болон БНСУ, Турк, Тайланд, Сингапурын туршлагыг танилцуулсан.

Их Британи, Румын, Словак, Энэтхэгийн шүгэлдэгчийн эрхийг хамгаалах хууль тогтоомжийг судалсан. Хамгаалалтад хамрагдах этгээд, мэдээлэх үйлдэл, мэдээлэл хүлээн авах байгууллага, мэдээлэгчийн нууцлал, ажлын байран дахь хамгаалалтыг авч үзсэн. Олон улсын байгууллагын зөвлөмж, зарчим болон бие даасан, салбар хуулиар хамгаалдаг зохицуулалтын онцлогийг танилцуулсан.